වඩා විශ්වාසදායි,බය පක්ෂපාතී වඳුරෙකු රැකවලා ලෙස යොදාගත් රජෙකුට වූ විපත්තියක් ගැන ජනප්‍රවාදයේ එයි. රජුගේ ගෙලේ වැසූ මැස්සෙකු එළවනු පිණිස රජුගේම අසිපතින් මැස්සාට පහරදීමෙන් රජුට එලොව යන්නට සිදුවීම එකී ඛේදවාචකයයි.දැනට තමන් ඇනගෙන පසුව ජනාධිපතිවරයාද අන්නවනු ඇතැයි සිතිය හැකි පර්ලිමේන්තු ප්‍රතිසංස්කරණ හා ජනමාධ්‍ය අමාත්‍යංශ ලේකම් නිමල් බෝපගේ මහතාගේ ක්‍රියා පිළිවෙත කෙරෙහි අවධානය යොමුකරනවිට සිහියට නැඟෙන්නේද රජු එලොව යැවූ වඳුරාය.
අමාත්‍යංශ ලේකම් ලෙස පත්වූ බෝපගේ මහතා පළමු ඇන ගැනීම වූයේ ඔහු විසින් කඩිමුඩියේ මාධ්‍යයට නිකුත් කළ නිවේදනයකි.
එහි සඳහන් වූයේ "ඒකාබද්ධ විපක්ෂය, නමින් දේශපාලන පක්ෂයක් නැති බැවින් එය ප්‍රවර්ධනය කිරීම සඳහා දායකවීමෙන් මාධ්‍යවේදීන් නීතිය ඉදිරියේ ප්‍රතිබන්ධනය වීමට ඉඩ ඇති බවයි". එම නිවේදනය මාධ්‍ය නිදහස අගයන්නන් සහ මාධ්‍යවේදීන් අතර තදබල විවේචනයකට සහ තිගැස්මකට ලක්වූ අතර රටපුරා එක් රැයක් ඇතුළත ආන්දෝලාත්මක මාතෘකාවක් බවටද පත්විය. අදාළ අමාත්‍යාංශයේ අමාත්‍යවරයාවූ ගයන්ත කරුණාතිලක වහ වහා අවධාරණය කළේ අදාළ නිවේදනය අමාතාංශ ලේකම් බෝපගේ ගේ පෞද්ගලික මතයක් මිස රජයේ මතය නොවන බවය.
උද්ගතවූ තත්වය අනුව එය තමන්ගේ පෞද්ගලික මතය ප්‍රකාශ කිරීමක් බවද නියෝගයක් නොව ආයාචනයක් බව පසුව ඉකුත් අප්‍රේල් 29 සිකුරාදා මාධ්‍ය හමුවකදී පිළිගැනීමට බෝපගේට අවසානයේදී සිදුවිය.
නිමල් බෝපගේ නම් ලේකම්වරයාගේ අනෙක් ඇනගැනීම වූයේ 'ජනාධිපතිවරයාගේ කතාවක් විකෘති කරන ලදැයි'දක්වමින් ටී.වී දෙරණට ලියුම් යැවීමයි.ජනාධිපතිවරයාගේ පමණක් නොව ඕනෑම අයෙකුගේ දේශනයකින්,මාධ්‍ය හමුවකින්,සංසිද්ධියකින් පුවතක් ලෙස සංස්කරණය කොට නිර්මාණය කරනුයේ අත්‍යවශ්‍යම වූ කොටස පමණක් බැව් නොදන්නා අයෙකු තොරතුරු ලෝකයේ සිටිය නොහැකිය.ටී.වී දෙරණේ විකාශය වූ ජනාධිපතිවරයාගේ කතාවේද අර්ථය විකෘතිවී නොමැති බව ජනාධිපති මාධ්‍ය ඒකකයෙන් එවන ලද නිවේදනයක් ද සමග කරුණු සහිතව තහවුරු කර තිබුණද,බෝපගේ විසින් යළි දෙරණට ලියුමක් එවන ලද්දේ දින 7ක් ඇතුළත කරුණු දක්වන ලෙස දන්වා ලියුම අත්සන් කෙරුණු දින සිට දින 6ක් ඉක්ම ගිය සවසක ප.ව 4.00ට පමණය.අවසානයේ එම සිදුවීමෙන්ද නැට්ට අකුළා ගැනීමට ඔහුට සිදුවිය.
නිමල් බෝපගේගේ අලුත්ම නාඩගම වූයේ සාස්තරකාරයෙකුට බියවී හීනෙන් දෙඩවීමයි.
"අතිගරු ජනාධිපති මෛත්‍රීපාල සිරිසේන මහතා ඝාතනය කිරීමේ අරමුණෙන් පූර්ව මාධ්‍ය මෙහෙයුමක් දියත් කිරීම සම්බන්ධව" හෙළිදරව් කිරීමට යයි පවසා ඔහු විසින් මාධ්‍ය හමුවක් කැඳවූයේ ඉකුත් 20 වනදාය.
ආන්දෝලනාත්මක හෙළිදරව් කිරීමක් සිදුවෙතැයි මෙම මාධ්‍ය හමුව ආවරණය කිරීමට ගිය මාධ්‍යවේදීන් බලාපොරොත්තු වුවද සිදුවූ‍යේ බෝපගේගේ විහිළු සැපයීමට දායකත්වය දීමටය.
විජිත් රෝහණ විජයමුණි නමැති ජ්‍යේතිර්වේදියෙකු යයි කියා ගන්නා පුද්ගලයෙකු විසින් තමන් මීට පෙරාතුව ප්‍රකාශයට පත් කළ අනාවැකි සියල්ල සත්‍යවී ඇති බවට ඒත්තු ගන්වා ඒ අයුරින්ම ජනාධිපතිවරයා ජනවාරි 26 දිනට පෙර කුමන ආකාරයෙන් හෝ මිය යන බවට කිසියම් "අනාවැකියක්"නිර්මාණය කොට සමාජ ජාල වෙබ් අඩවි හරහා ප්‍රසිද්ධියට පත්කොට ඇති බව බෝපගේ මෙහිදී සඳහන් කළේය.
එබැවින් ජනාධිපතිවරයාට තර්ජනයක් ඇති බව තමන් පිළිගන්නා බැවින් ඒ පිළිබඳ පරීක්ෂණයක් සිදුකරන මෙන් තමන් විසින් පොලිස්පතිවරයාට පැමිණිලි කරමින් ඉල්ලා සිටි බව බෝපගේ මහතා කියා සිටියේය.
පසුගිය කාලයේ මිථ්‍යාවට එරෙහිව සමාජ සාධාරණත්වයට පක්ෂව කටයුතු කළ සියලුම දෙනා පාහේ මහින්ද රාජපක්ෂ මහතාගේ වශී බෝලය විවේචනය කරන ලදී.එය හාස්‍යයට ලක්කරන ලදී. සුමනදාස අබේගුණවර්ධන නම් රාජපක්ෂ‍ගේ ජ්‍යෙතිර්වේදියා අපමණ උපහාසයට ලක්වූවා පමණක් නොව උපුල් ශාන්ත සන්නස්ගල විසින් මෙහෙයවූ "සත්‍යාගාරය"වැඩසටහන තුළින් නැති භංගස්ථාන කරනු ලැබිණි.කුමන පාලකයත්,කුමන පාලකයාට වන්දභට්ටකම් කරන රාජ්‍ය නිලධාරියාත් තාම සිටින්නේ මහපොළොව මත සිටගෙන නොව සාස්තරකාරයින්ගේ හීන ලෝකවල බැව් බෝපගේගේ හැසිරී‍මෙන් තවත් තහවුරු විය.
සමාජ ජාල වෙබ් අඩවියක පමණක් ප්‍රසිද්ධියට පත්වූ අනාවැකිය සම්බන්ධයෙන් ලේකම්වරයාගේ ප්‍රතිචාරය ප්‍රධාන ධාරාවේ ජනමාධ්‍ය මගින් ප්‍රචාරය වන විට ඊට අදාළ අනාවැකියට යළිත් ප්‍රධාන ධාරාව තුළ පවා ප්‍රසිද්ධියක් ලැබෙන බැව් ඔහු නොදනියි.
මේ සම්බන්ධයෙන් ප්‍රධාන ධාරාවේ මාධ්‍ය තුළින් අනවශ්‍ය ප්‍රචාරයක් ලබාදීමෙන් පසු ආචාර ධර්ම කඩ කළ බවට නිමල් බෝපගේ මහතාගෙන්ම නිදහසට කරුණු විමසා ලිපි ලැබෙනු ඇත්දැයි මාධ්‍යවේදියෙකුද අදාළ මාධ්‍ය හමුවේදී ප්‍රශ්න කරන ලදී.ඊට ප්‍රතිචාර ලෙස අමාත්‍යංශ ලේකම්වරයා සිනාසුනා මිස කිසිත් නොකීවේය.
මිථ්‍යාවන් ඇදහීමට,ඕපදුප කරතියාගෙන යාමට අවශ්‍ය කෙනෙකුට ඒ සඳහා අයිතියක් ඇතැයි කෙනෙකුට තර්ක කළ හැකිය.ඒත් ගැටළුව වන්නේ මහජන මුදලින් නඩත්තුවන ආයතනයක,මහජන මුදලින් නඩත්තුවන රාජ්‍ය නිලධාරියෙකු තමාට පැවරී ඇති බලය අවභාවිතා කරමින් මිථ්‍යාවට උඩගෙඩිදීමට කටයුතු කිරීම කෙතරම් සුදුසුද යන්නයි.නිමල් බෝපගේ වැන්නන් හෙට දවසේත් ජනාධිපතිවරයා කෙරෙහි අචල භක්තියෙන් යුතුව මෙවන් ගොන්පාට් රඟ දක්වනු ඇත.එහෙත් අණක් ගුණක් නොදත් වඳුරාගෙන් රජුට සිදුවූ විනාශය මෙන්ම බෝපගේ වැන්නන්ගේ ක්‍රියාපිළිවෙල හේතුවෙන් වඩා හානියක් ගෙනදෙන්නේ ද ජනාධිපතිවරයාටමය.නෝන්ඩි වෙන්නේ ආණ්ඩුවය. මේ බැව් වැටහෙන වගකිව යුත්තන් ඇත්නම් කළ යුත්තේ තැන් තැන්වල පුද්ගලිකව තම තමන්ගේ අප්‍රසාය පළකිරීම නොව වහාම ක්‍රියා මාර්ග ගැනීමය.
No comments:
Post a Comment