‘‘අවවාදයට වඩා ආදර්ශය උතුම්ය, යන්න ප්‍රසිද්ධ ආප්තෝපදේශයකි. ‘ගුරා හිටගෙන චූ කරනවිට ගෝලයින් දුව දුවා චූ කරන බවට‘වන කියමනක්ද අප අතර වෙයි. කොහොම වුණත් මේ කියමන් එතරම් අහිංසක නොවන බව යළි යළිත් අපට පසක් කරවමින් තිබේ. ඒ රටේ නීතිය ක්‍රියාත්මකවීම සම්බන්ධයෙනි. ඒ නීතියට ඉහළින් කැරකෙන අදිසි හස්තයක් නොව සදිසි හෙවනැල්ලක් සේ පාලකයින්ගේ ආදර්ශය බලපවත්වන බැවිනි.
මෛත්‍රීපාල සිරිසේන මහතා විසින් පසුගිය ඔක්තොම්බර් 12 වන දින පදනම් ආයතනයේ පැවති සත්විරු සංහිඳ නිවාස හා ඉඩම් හිමිකම් ප්‍රදානෝත්සවයේදී CID,FCID හා අල්ලස් කොමිසම දේශපාලන න්‍යාය පත්‍රවලට අනුව කටයුතු කරන්නේ නම් තමන් ඊට එරෙහිවද දැඩි තීන්දු තීරණ ගැනීමට සිදු වන බව කියා සිටියේය.හිටපු ආරක්ෂක ලේකම්වරයා හා හිටපු නාවික හමුදාපතිවරුන් අධිකරණයට හමුවට පැමිණවු ක්‍රමවේදයට තමන් එකඟ නොවන බවද කීය.එතෙකින් නොනැවතුණු ඔහු ස්වාධීන කොමිෂන් සභාවන්හි ගෞරවයද හෑල්ලු කළේය.ස්වාධීන කොමිෂන් සභා පත්කරනු ලැබුවේ 19 වන සංශෝධනයට අනුව වත්මන් ආණ්ඩුවේද මැදිහත් වීම සහිතවය. එය ජනතාවගේත් සිවිල් සමාජ කණ්ඩායම්වලත් ඉල්ලීමක් වූ අතර ආණ්ඩුව ජනතාවට දුන් ප්රධාන පොරොන්දුවක්ද විය. තනි පුද්ගලයෙක් විසින් ඉහත ආයතන මෙහෙයවීම වෙනුවට ඇතැම් අඩුපාඩු සහිතව වුවත් කොමිෂන් සභාවක් විසින් මෙහෙයවීම වඩා ප්‍රජාතන්ත්‍රවාදීය. එබැවින් “ස්වාධීන කොමිෂන් සභාවලට සම්බන්ධ අය රාජ්‍ය පාලනය නොදන්නා අය” ලෙස පවසා එම ආයතන හෑල්ලූ කිරීම කිසිසේත්ම අනුමත කළ නොහැක. ජනාධිපතිවරයාගේ ප්‍රකාශයෙන් දින කිහිපයකට පසුව අල්ලස් හෝ දූෂණ චෝදනා විමර්ශන කොමිෂන් සභාවේ සභාපතිනිය වූ දිල්රුක්ෂි ඩයස් වික්‍රමසිංහ ඉල්ලා අස්විය. ඒ සම්බන්ධයෙන් කිසිවෙකුත් ප්‍රශ්න කරන බවක් දක්නට නොලැබුණි. ඉනික්බිතිව එළඹුණු කාලය තුළ එතෙක් ඇප නොලැබූ සැකකරුවන් සහිතව නඩු විභාග කෙරුණු ප්‍රගීත් එක්නැලිගොඩ අතුරුදහන්කරවීමේ සිද්ධියේ සැකකරුවන්ට විටෙන් විට ඇප ලබාදීම සිදුවිය. අද වන විට ඔවුන් සියලුමදෙනා ඇප මත නිදහස් කර ඇතිවා පමණක් නොව රිමාන්ඞ් බන්ධනාගාරගතව සිට ඇප ලබා පැමිණි යුදහමුදා සාමාජිකයන් වන ලුතිනන් කර්නල් ෂම්මි කුමාරරත්න සහ මාණ්ඩලික සැරයන් සුබ්‍රමනියම් නැවත යුදහමුදා සේවයේ පිහිටුවීමට අවශ්‍ය කටයුතු සියල්ල යුද හමුදාපතිවරයා විසින් සිදුකර ඇතැයි වාර්තා වේ.
මේ පිළිබඳ යුදහමුදා මාධ්‍ය අංශය පෙන්වාදී ඇත්තේ මෙම හමුදා නිලධාරින් දෙදෙනා තවම සැකකරුවන් බවත් ඒ නිසා සේවයේ පිහිටුවීමට බාධාවක් නැති බවත්ය. ඔවුන් යුදහමුදා ස්වේච්ඡා සේවයේ නිලධාරීන් බැවින් යුදහමුදාපතිවරයාට ඔවුන් යළි සේවයේ පිහිටුවීමට ආයතන සංග්‍රහය අනුව බලය තිබෙන බවත් ඔවුන්ගේ අදහසයි. එසේම මෙම සැකකරුවන් අතර සිටින සාජන් මේජර් නෙරන්ජන් උපසේන හා ලුතිනන් චමින්ද කුමාර අබේරත්න යළි සේවයේ පිහිටුවන්නේ නම් එය ආරක්ෂක අමාත්‍යාංශය විසින් සිදුකළ යුතු බවත්, සැකකරුවන් අතර සිටින සැරයන් ප්‍රියන්ත කුමාර රාජපක්ෂ විශ්‍රාමිකයකු වන අතර කෝප්‍රල් රවින්ද්‍ර සුබසේන යුදහමුදාවෙන් ඉවත් කළ අයෙකු බවත් සඳහන්ය. ඒ විතරක් නොව මාලබේ ප්‍රදේශයේදී සිදුකළ මිනීමැරුමකට සැකපිට අත් අඩංගුවේ සිටින යුදහමුදා සාමාජික ලුතිනන් කර්නල් ප්‍රදිප් කුමාර වෙත්තසිංහ ඇප ලබා පැමිණියහොත් නැවත රැකියාවේ පිහිටුවන්නේ නම් එයද සිදුවන්නේ අමාත්‍යාංශය මගින් ගන්නා තීරණයක් මත බවද යුද හමුදා මාධ්‍ය අංශයේ නිලධාරියෙකු ඉකුත් සතියේ සති අන්ත පුවත්පතකට ප්‍රකාශ කර තිබුණි. ගැටළුව එය නොවේ.
යුදහමුදාපතිවරයා විසින් මෙම කටයුත්ත සිදුකර ඇත්තේ එවැනි වැරැදි සම්බන්ධයෙන් සැකපිට අත්අඩංගුවට පත්වී රිමාන්ඞ් බන්ධනාගාර ගතවූ යුදහමුදා සාමාජිකයන් රාශියක් ඇප ලැබීමෙන් පසු නැවත සේවයේ පිහිටුවා නැති තත්ත්වයක් තුළය. එසේම අපගේ යුදහමුදා ආරංචි මාර්ග වැඩිදුරටත් ප්‍රකාශ කරන්නේ ලුතිනන් කර්නල් ෂම්මි කුමාරරත්නට ඔහුගේ රාජකාරි වාහනය ඔහු වැඩ තහනමට ලක්වී සිටි අවධියේදීද දිගටම භාවිතා කිරීමට යුද හමුදාපතිවරයා ඉඩ ලබාදී තිබූ බවය. ජනාධිපතිවරයා විසින් ඔක්තොම්බර් මාසයේදී සිදුකරන ලද ප්‍රකාශයත්, යුද හමුදාපතිවරයාගේ මෙම ක්‍රියා මාර්ගයත් අතර සම්බන්ධයක් නැතැයි කාටවක් කිව නොහැක්කේ ආරක්ෂක අමාත්‍යවරයා වන්නේද, ත්‍රිවිධ හමුදා ප්රධාන අණදෙන නිලධාරියා වන්නේද ජනාධිපතිවරයා වන බැවිනි.
පසුගිය දෙසැම්බර් 23 වෙනිදා අධිකරණ ඇමැති විජයදාස රාජපක්ෂ මහතා මඩකළපුවේ මංගලාරාමයේදී එහි වාසය කරන පූජ්‍ය අම්පිටියේ සුමන සහ පූජ්‍ය ගලගොඩ අත්තේ ඥානසාර නමැති අන්තවාදී හිමිවරුන්ගේ දෙපා නැමැඳ ඔවුන්ගේ මැර ක්‍රියාකාරකම් සාධාරණීකරණය කරමින් මාධ්‍යයට ප්‍රකාශ නිකුත් කරන ලදී. මේ හිමිවරුන් දෙදෙනාම අධිකරණ නියෝග නොතකා ක්‍රියා කිරීම හේතුවෙන් පවතින නඩු වල ඇප මත සිටින චුදිතයන් දෙදෙනෙකි.
ඇප මත නිදහස් කිරීම යනු චෝදනාවන්ගෙන් නිදොස් කොට නිදහස් කිරීමක් නොවන බව අමුතුවෙන් කිව යුතු නොවේ. අධිකරණ ඇමැතිවරයා ගොස් වැඳ වැටී ඔවුන්ගේ ක්‍රියාකලාපයන් සාධාරණීය කිරීම බරපතළ කාරණයක් වන්නේ එබැවිනි.
අම්පිටියේ සුමන හිමියන් විසින් පසුගියදා රජයේ නිලධාරියෙකු වූ මඩකළපුවේ ග්‍රාම නිලධාරී මහතෙකුගේ රාජකාරියට බාධා කරමින් ඔහුට ‘තෝ කොටියෙක්මයි‘ යනුවෙන් ප්‍රසිද්ධියේ වර්ගවාදී වෛරී භාෂාවෙන් බැන වැදී තිබුණි. මේ සම්බන්ධයෙන් නීතියෙන් කටයුතු නොකරන්නේ මන්දැයි විමසා අධිකරණ අමාත්‍යාංශ ලේකම් වරයා විසින් නීතිපතිවරයා වෙත ලිඛිතව විමසා යවා තිබිණ. පොලිසිය ඒ අනුව ඔහුට එරෙහිව නඩු පවරා තිබියදී අධිකරණ ඇමැතිවරයා ගොස් සුමන හිමියන් හමුවීම උන්වහන්සේගේ වෛරී වර්ගවාදී බැන වැදීම් සාධාරණීකරණය කිරීමක් නොවන්නේද? ඥානසාර හිමියන්ද මුස්ලිම් ආගමික ස්ථානවලට පහරදීම, වර්ගවාදී ගැටුම් ඇතිකිරීම ඇතුළු චෝදනා ගණනාවකට අදාළව විභාගවන නඩුවල සැකකරුවෙකු මෙන්ම බීමතින් රිය පදවා අනතුරු සිදුකිරීමේ වරදකට අධිකරණයෙන් දඬුවම් ලැබූවෙකුද වේ. එහෙව් අයෙකු පසුබිමෙන් තබාගෙන ඔවුන්ගේ ක්‍රියාකාරකම් සාධාරණීයකරණය කරමින් මාධ්‍යයට ප්‍රකාශ නිකුත් කිරීම විසින් ගම්‍යකරනු ලබන්නේ ‘අවවාදයට වඩා ආදර්ශය“ උතුම් බව නොවේද?
කලකට ඉහතදී රබර් සෙරෙප්පු දෙකක් දාගෙන පාපැදියකින් මීගමුව නගරයේ තැනින් තැන රස්තියාදු ගැසූ නිමල් ලංසා ඉතා කෙටි කලකින් කෝටිපතියෙකු බවට පත්වීම රටට රහසක් වුවත් මීගමුවට රහසක් නොවීය. එහෙව් ලංසාගේ නිවසත්,ඔහුගේ හිතවතෙකුගේ නිවසත් පොලිස් විශේෂ කාර්ය බලකායේ 150ක පමණ පිරිසක් විසින් හදිසි වැටලීමක් කරනු ලැබුවේ 2011 ඔක්තෝම්බර් මස 18 දාය. සිද්ධිය සැලවූ වහාම එවක ආණ්ඩුවේ ප්‍රබල අමාත්‍යවරයෙකු මෙන්ම එවක ජනාධිපතිවරයාගේ සොහොයුරා වූ බැසිල් රාජපක්ෂ නිමල් ලංසා හමුවීමට ඔහුගේ නිවසට ගියේය. තවත් ටික වේලාවකින් ජනාධිපති මහින්ද රාජපක්ෂ මහතාද,ලංසාගේ දුක සැප විමසා බැලීමට ඔහුගේ නිවසට ගියේය.වැටලීම සිදුකිරීම සඳහා අණ ලැබුණේ කොතැනින්දැයි සොයා බලන බවත්,සිද්ධිය සම්බන්ධයෙන් කනගාටුව ප්‍රකාශ කරන බවත් රාජපක්ෂලා ලංසාගේ දෑත් අල්ලාගෙන කියා සිටියහ. ලංසා සම්බන්ධයෙන් සිදුකරන්නට මුල පිරූ පරීක්ෂණ ලත් තැනම ලොප්විය.
“මමයි රටේ පාලකයා. මම ඉන්නේ ලංසා එක්ක.උඹලා විහින් අමාරුවෙ වැටෙන්න එපා”
රාජපක්ෂ විසින් එදින ලබාදුන් පණිවිඩය එවැන්නකි. ඉන්පසු කිසිවෙකුත් ලංසාට එරෙහිව නීතිය ක්‍රියාත්මක කිරීමට තබා කටක්වත් හෙල්ලුවේ නැති බව සියලුදෙනා දනිති.
මහින්ද රාජපක්ෂ 2015දී ගෙදර ගියේය. ලංසලා තවමත් යෙහෙන් වැජඹෙති. එපමණක් නොවේ. එකල එවක ජනාධිපතිවරයාගේ ක්‍රියා කලාපය විවේචනය කිරීමට සිවිල් සංවිධාන හා නිදහස් මතධාරීන් බොහෝ සිටියහ. එහෙත් අද දවසේ ජනාධිපතිවරයාගේ, යුද හමුදාපතිවරයාගේ හෝ අධිකරණ අමාත්‍යවරයාගේ ක්‍රියා කලාපය වැරදි බව පෙන්වාදීමට කිිසිවෙකු ඇත්තේ නැත.
එවක ඥානසාර හිමියන් ඇතුළු බොදුබල සේනා සංවිධානයද, සුමන හිමියන් ඇතුළු වර්ගවාදී අන්තවාදී හිමිවරුන්ද සිටියේ රාජපක්ෂ හෙවනැල්ලේ ආරක්ෂාව ලබමිනි. මේ දිනවල තමන්ගේ පරාජය පිළිබඳ ආපසු හැරී බලන මහින්ද රාජපක්ෂ මහතා, තම පාලනය බිඳහෙළීමට බොදු බල සේනා සංවිධානය සහ අමාත්‍ය චමිපික රණවක එක්සත් ජාතික පක්ෂය සමග එක්ව කටයුතු කළ බව කියා සිටියි.
මුස්ලිම් ජනතාවට පහරදී සැළසුම් සහගත ලෙස තමන්ගෙන් ඔවුන් ඈත් කල බව හිටපු ජනාධිපතිවරයා අවධාරණය කරයි. බලයේ සිටියදී ඔවුන්ට එරෙහිව නීතිය ක්‍රියාත්මක නොකළේ ඇයිදැයි මාධ්‍ය වේදීන් විසින් විමසු විට හිටපු ජනාධිපතිවරයා පැවසුවේ එවකට කැබිනට් මණ්ඩලයේ චම්පික රණවක අමාත්‍යවරයා ඊට විරුද්ධ වෙමින් ප්‍රශ්න ඇති කළ බවය.
දැන් එකී චම්පික රණවක අමාත්‍යවරයා සිටින්නේ යහපාලන ආණ්ඩුවේය. පසුගියදා ඥානසාර හිමියන් ඇතුළු පිරිසක්ද ගොස් ජනාධිපතිවරයා හමුවී සාකච්ඡාවක් සිදුකරන ලදී. එකඟතාවන් මොනවාදැයි අපි නොදනිමු. ආදර්ශය උතුම්වන්නේ පුද්ගල කේන්ද්‍රීයව පමණක් නොවේ. අතීතයද ආදර්ශවත්ය.
No comments:
Post a Comment